中環出更：貪曾見記者速逃 心中有鬼？
「貪曾」前特首曾蔭權爵士已經「潛伏」咗一排，唔知係咪因為呢兩日天氣回暖，貪曾同太太曾鮑笑薇一連兩日出嚟行街。前日兩人先喺尖沙咀現身，尋日又出現喺中環。不過明明尋日下午天氣尚算和暖，但貪曾就着住羽絨、戴埋冷帽出動，霎眼望落去，仲以為係一位身子弱嘅老人家添！
卓妮前晚喺尖沙咀一間酒店外，見到貪曾嘅座駕停咗喺度，轉頭就見貪曾木無表情咁同曾鮑笑薇喺酒店行出嚟，兩人一枝箭咁上車，好似驚畀人見到咁款。咁啱尋日下午時分，卓妮又喺中環太子大廈外遇到貪曾夫婦，仲有一位保鏢同行。
綠羽絨 樽領衫 騰騰震
着住件綠色羽絨、橫間樽領衫，襯埋頂黑色冷帽嘅貪曾，個樣同一個普通阿伯無異。曾鮑笑薇就着咗套黑色衫褲，平平無奇嘅衣着打扮，唔知係咪要襯番貪曾？凍到縮吓縮吓咁行嘅貪曾，一入到商場就除低頂冷帽先，跟住行入一間時裝店睇男裝。
呢個時候，貪曾嘅保鏢發現咗卓妮，於是就行埋嚟同卓妮交涉話︰「佢哋兩公婆行吓街咋，唔好影喇！」隨後保鏢即向貪曾匯報。貪曾夫婦收到風，速速離開時裝店，曾鮑笑薇仲不時擰轉頭望卓妮，個樣好鬼祟。正當佢哋速逃嘅時候，保鏢嗱嗱聲打電話通知司機嚟接人。
貪曾一行人行到雪廠街時，就企定定等車，不過由於座駕未到，佢哋就圍繞歷山大廈行咗一個圈，認真無聊。後來貪曾座駕一到，佢哋即刻跳上車，拉埋車窗簾，絕塵而去。
卓妮