新一份施政報告冇乜驚喜，講得好聽叫務實，講難聽即係冇料到。如果要搵「亮點」，落實興建啟德醫院，應該算係嘞啩，問題係，落實唔等於成事，呢間大型急症全科醫院能唔能夠如期動工如期落成，仲要睇過至知。
即係咁，醫療衞生政策係施政報告重點之一，列出嘅措施起碼有十項之多，睇落唔算少，尤其係啟德醫院，市民望到頸都長，家陣終於落實，總算冇令人失望。按港府嘅如意算盤，醫院第一期工程二○二一年完工，而第二期工程就未有時間表。之不過，今時今日阻滯多多，港府施政舉步維艱，醫療「宏圖」最終可唔可以完成，仲有好多變數，情況並唔樂觀。
就以計劃中嘅中藥檢測中心嚟講吖，當局話中心會為中藥安全、品質及檢測方法建立參考指標，又會喺著名國際專家帶領下，研究同釐定香港中藥材標準，即係「港標」；仲會透過同內地及海外合作，推廣「港標」成為國際權威標準，令本港中藥業邁向國際喎。
聽落就幾吸引喇，但究竟可唔可以成事，言之尚早。冇錯，本港開埠百幾年來，中醫一直傳承不衰，擁有唔少優秀人才，將中醫發揚光大，香港可以話係不二之選。可惜港產官僚從來都係得把口，講就天下無敵，做就無能為力，宏圖大計十有八九爛尾收場。
講到中藥檢測中心，好多人會諗起董建華時代提出嘅「中藥港」，開頭係威係勢，卒之淪為大隻講。有中醫研究學者表示，早已就中醫藥發展前景提交「成寸厚嘅報告」，建議當局興建日間中醫院，治療病人同培訓人才一舉兩得，點知前朝貪曾政府當報告冇到，覆都冇覆，最終石沉大海。
講開貪曾吹水唔抹嘴，真係火都嚟埋。佢提出嘅所謂六大優勢產業，全部虎頭蛇尾，唔湯唔水，到依家都未有一項成事，相反，所謂醫療產業及教育產業更加係禍港殃民，搞到七國咁亂。
退一步講吖，就算港府真係想有所作為，亦未必可以做到嘢。家陣香港社會愈來愈政治化，政客為反對而反對，為拉布而拉布，港府根本寸步難行。喺咁嘅環境下，無論落實興建啟德醫院，或者設立中藥檢測中心，隨時又係好事多磨，跪低收場嘅咋。
嗱，市民冇嘢擔心，最擔心就係港產官僚唔識吸取教訓，一廂情願，眼高手低，到頭來醫院落成無期，「港標」變「港殤」，咁就該煨咯！