佔領行動過後，泛民主派重新洗牌，到底北京部署同大方向有否改變，建制派都好想知道，所以近日建制派都從各自渠道北上收風，務求掌握第一手消息。好似新民黨主席葉劉淑儀，據聞佢飛去北京同港澳辦官員見面。而一班港區人大代表，尋晚亦出發到深圳紫荊山莊，預備今日聽取基本法委員會主任李飛發表講話，唔知到時李飛會發表乜嘢中心思想呢？
葉太一連兩日缺席特首宣讀《施政報告》及答問大會已令政界猜疑。我哋尋日終於打聽到，葉太周一晚上飛咗去北京，一共留咗喺北京四日，尋晚先夜機返港。據聞佢今次北上先後同港澳辦、發改委官員見面。我哋問過葉太到底傾咗啲乜，係咪同港澳辦主任王光亞見面，佢先笑而不語，然後只係話同「老朋友」見面食飯，又話經過今次之行，有啲新諗法喎。
另外喺今日下午，深圳紫荊山莊有場人大舉辦嘅專題講座，李飛將南下做主持。聽聞一批港區人大知道有京官南下，尋晚已經心急如焚趕上深圳，希望快人一步收到北京對最新形勢嘅判斷。據悉，今日深圳呢場專題講座唔係講政改，只係講內地經濟，但李飛會否中途加插「講話」，好快就揭盅。