政情：辭職公投？ 公文袋縮沙

團體倡泛民總辭無果

本來五方會談隨着佔領行動結束，早已經成為歷史產物，但由於最近何俊仁突然提出打算喺政改表決後辭職，引發全港變相公投，因而令五方會談「翻生」，各政團埋枱討論前路點樣走。有人爆料話，會上氣氛充滿火藥味，唔單止無達成共識，更係不歡而散。

因為會上大部分人，例如雙學同佔中三子，都唔支持白鴿黨喺表決後先辭職，當中仲有人建議搞番五區變相公投，咁就唔怕畀白鴿黨搶盡政治光環。更有非政黨團體提議，要搞就搞到最激，整鋪泛民總辭啦，但呢個建議當然無人理，有人仲彈咗句「咪傻啦」作回應。咁又係，辭職又無約滿酬金，又要花幾多百萬搞選舉，唔係個個黨都肯犧牲自己。

毛孟靜郭家麒賴死唔走

聽聞會上其中一個大力反對辭職公投嘅係公文袋，佢哋不停強調收集過一輪地區意見後，發現市民對辭職公投反應麻麻，甚至係偏向負面。所以佢哋唔支持五區公投，更加唔支持乜嘢二十七名泛民議員總辭。市民唔支持其實只係擋箭牌，實情就係該黨唔想自己友辭職，尤其係九龍西毛孟靜同新界西郭家麒。

有白鴿黨中人就好不滿，既然公文袋唔同意公投，就應該對外都係咁講，但可惜公文袋對外扮無所謂，對內就鬧爆辭職公投。該白鴿黨中人透露，佢哋都有諗過五區公投，但當時佔領行動未結束，呢個方案就因為得唔到各黨派共識而擱置。講得白啲，即係有政黨縮沙唔敢辭職。講到底，泛民政黨都係各懷鬼胎，鬼打鬼互指不是，睇怕做咩都係注定失敗。