中環出更：特首答問會 副局集體「釣大魚」
立法會尋日舉行特首答問大會，由於教育局局長吳克儉、財經事務及庫務局長陳家強等人前日喺特首宣讀施政報告期間被發現公然瞓覺，令多位局長尋日全程睜大隻眼唔敢耷低頭，費事再被人影到。雖然局長們打醒十二分精神，但一眾坐喺樓上官員席嘅副局長就無吸取教訓，個個「釣晒大魚」，直到答問大會臨近結束先至瞓醒。唔知係啲議員提問無新意吖？抑或一班副局長唔夠瞓呢？
大會開始唔夠半個鐘，戴住耳筒嘅運輸及房屋局副局長邱誠武率先進入夢鄉。坐喺佢隔籬嘅食物及衞生局副局長陳肇始喺幾分鐘之後亦不敵睡魔侵襲，俯身兼耷低頭瞓着咗。至於勞工及福利局副局長蕭偉強（Stephen）開頭都有聆聽議員發言，但亦好快「投降」瞓咗。勞福局發言人澄清，Stephen當時並無瞓覺，話佢當時「頭郁郁」只係做伸展動作喎。
發叔改戴淺藍呔
除咗一班副局長開會唔夠專心外，立法會主席曾鈺成亦出現「走漏眼」情況。話說佢喺趕走社民連梁國雄等人離開會議廳後，又裁定工黨李卓人嘅言論有冒犯性。阿人喺提問後一度向CY方向行去，嚇到在場保安如臨大敵，而曾鈺成亦要求阿人離開會議廳。殊不知阿人喺呢個時候轉身同坐喺最前排嘅公民黨梁家傑握手，再施施然離開會議廳。
不過，阿人喺十幾分鐘後突然行返入會議廳，似乎唔知道曾鈺成已經下咗「逐客令」。直至答問大會尾聲，曾鈺成聽到阿人插嘴講嘢，先至如夢初醒，提醒阿人已被佢逐出會議廳，唔明阿人點解仲可以入返去喎。
另外，前日開會因為戴咗鮮黃色呔而要急急當眾除呔嘅嘅劉皇發，尋日就改戴淺藍色呔，被問到戴藍呔係咪要顯示「政治正確」，發叔就風騷回應一句：「你都可以咁講嘅」。
卓妮