去年三月底卸任香港大學校長嘅著名分子遺傳學家徐立之，啱啱被有「東方劍橋」之稱嘅浙江大學聘任旗下求是高等研究院院長，呢間研究院係校方重要研究基地。徐立之話，希望利用研究院平台，發揮自己嘅研究特長同埋管理經驗，聯合校內外嘅研究團隊，為內地高校建設和科研創新發展盡分心力。
雖然徐立之喺港大校長任內惹出唔少是非，不過佢嘅研究成就仍然受到學術界推崇，包括帶領香港研究小組參與人類基因單倍型圖國際研究計劃，參與完成首個人類基因變異嘅詳圖。據聞求是高等研究院係浙大「研究特區」，利用校方喺納米技術、信息科學、生物醫學工程等研究成果，開展交叉研究，並將最新研究成果應用於臨床、公共安全等領域。講開又講，浙大發展委員會主席係港人熟識嘅新華社香港分社前副社長張浚生，唔知今次徐立之受聘同張浚生有冇關係呢？