政情：謝偉俊怒插貪曾禍港
我哋早喺兩年前已報道過，被指與西環關係良好嘅立法會議員謝偉俊（Paul）會搞一個智庫，當時有傳佢曾經接觸過革新會成員黃博度。尋日阿Paul終於正式宣布另起爐灶，成立智庫「革新社」，但阿Paul強調並非組黨，只係搵志同道合嘅朋友一齊論政，首先會聚焦社會深層次矛盾，例如官商勾結同樓價高企問題。講起呢兩個「病症」，阿Paul忍唔住點名批評「貪曾」前特首曾蔭權爵士貪污，以及在任時期放任樓價飛漲，搞到佛都有火。
阿Paul前年開始擔任「創建力量」嘅法律顧問，去年就加入由中產人士組成嘅「中產會」，最近另起爐灶成立革新社，並出任召集人。阿Paul話，香港回歸十七年，無論政制、經濟、民生等各方面，都面臨緊嚴峻考驗，所以佢將會先聚焦引致民怨沸騰嘅深層次矛盾。
另點名鬧貪湯許仕仁
阿Paul列舉六項社會深層次矛盾，首當其衝係「官商勾結，世界第一」，點名批評曾蔭權、前政務司司長許仕仁及「貪湯」前廉政專員湯顯明，指佢哋收受利益，幫助商界謀利。其次係「樓價居高不下，置業遙不可及」，即係話曾蔭權在位時嚴重控制土地供應，導致樓價大幅飆升。當時市民對政府最直接嘅印象就係官商勾結、地產霸權，埋下市民對政府不滿嘅禍根。其他問題就包括青年難於向上流、貧富懸殊、中港矛盾等。
睇番革新社嘅成員名單，除咗有黃博度擔任顧問，旅遊界侯叔祺、香港政策研究所行政總裁馮可強、大律師陳炳釗、中港通董事總經理陳宗彝等都係成員。Paul話，雖然佢哋陣營唔係好多猛人，亦未有太多資源，但都唔會搵壹傳媒集團前主席黎智英支持喎！