係人都知消防處不務正業，綽號「消閒處」，大家又知唔知原來佢哋仲有另一個外號，叫做「消防水族館」呢？
嗱，唔係功夫茶吹水o架。話說位於紅磡佛光街嘅紅磡消防局，竟然喺局內操場牆邊起咗一個長兩米、高一米嘅錦鯉池。咪睇小呢個魚池呀，喉管、濾水管同水泵一應俱全，睇嚟揼咗唔少本；池內十幾條錦鯉，條條呎幾長，顏色鮮艷，活潑生猛。消防官僚無所事事賞錦鯉，真係快樂不知時日過呀。
之不過咁，消防官僚玩錦鯉就過癮咯，附近街坊就多得你哋唔少。原來緊貼魚池嘅外牆滲水已經超過一年，除咗浪費食水，有干犯水務法則之嫌，更令人擔心嘅係路面水氹處處，孳生蚊蟲唔在講，萬一長者婦孺行過跣親，邊個負責吖？仲有吖，消防處又唔係漁護署，做咩無喇喇養缸錦鯉，水池係咪違章建築？係咪浪費公帑？正如有立法會議員話齋，未聽過消防局有錦鯉池，亦唔相信編制內寫明要有魚池或者錦鯉，消防處有必要詳細交代，仲要講埋財政開支，當局亦要交代點解審批。
好嘞，姑且聽吓消防處點解畫。佢哋話喎，魚池歷史悠久，係用嚟改善工作環境，等員工休息時可以怡情同增加歸屬感，而日常費用係由局員自行集資。至於漏水問題，局方輕描淡寫，淨係話會跟進喎。
咁就好笑嘞，講到怡情同增加歸屬感，平時喺局內打排球開燒烤P照計都夠喇，做乜係都要花大錢養成池錦鯉呢？再講吖，即使員工私人夾錢都好大問題o架，試諗吓，官僚一聲令下，大石壓死蟹，屬下想唔夾錢都唔得喇。呢，醜聞曝光後，消防局拿拿臨放清池水夾走錦鯉，如果唔係心中有鬼，點解要「毀屍滅迹」先？
仲有一個問題值得研究，點解消防處唔係養雞養鴨，偏偏要養錦鯉呢？哈，聰明嘅讀者一定估到，呢啲都係前特首貪曾惹嘅禍。係人都知，貪曾貪威識食，最識享受，除咗黐住富豪歎盡省港澳，最鍾意就係帶傳媒入禮賓府影佢養嘅名貴錦鯉，上有好者，下必甚焉，消防處都係有樣學樣啫。
上樑不正下樑歪，回歸後港產官僚一蟹不如一蟹，烏煙瘴氣嘅又點止消防處，亂象叢生嘅又點止養錦鯉吖。今時今日，官員大有大貪，小有小貪，搞到廉潔指數跌跌不休，唔怪得有人話，港產官僚同國產官僚一擔擔，遲早「一國一制」嘅咋。
一句講晒，一日最衰都係貪曾。香港要肅正歪風邪氣，最緊要學內地打老虎拍蒼蠅，一旦貪曾、貪湯之流被繩之以法咯喎，睇吓邊個仲夠膽不務正業養錦鯉吖嗱！