錦鯉自古便被國人視為吉祥之風水魚，有「活寶石」美稱，通常多被飼養於寺院、廟社的池塘；當然，富貴人家有花園魚池者亦愛養之，以增室內靈動華貴之氣。
之不過，位於佛光街嘅紅磡消防局，竟亦豪養錦鯉，在局內操場牆邊花公帑建大型魚池養錦鯉，離譜嘅係，緊貼魚池外的外牆滲水，搞到積水處處，除了浪費食水、容易孳生蚊患影響環境衞生，最攞命嘅係容易令行人跣倒。
有立法會議員質疑消防處養錦鯉理由，嘲諷「個個都學曾蔭權」；好學唔學學貪曾，咁邊度會有運行啊！消防處回應就話魚池設置已是歷史悠久，用以改善工作環境，供屬員休息時欣賞以怡情及增歸屬感喎！
唉！咁嘅官腔「看似尋常最奇崛，成如容易卻艱辛」，呢個答案，比起消防處○三年六月高調派員到東方報業中心調查時，聲稱接獲電郵投訴，懷疑大廈伺服器房灑水系統冇運作，令人啼笑皆非的程度相差無幾！當年，投訴內容連伺服器房的位置亦欠奉，投訴人亦冇聯絡電話，如此「真騷擾假調查」，明明製造白色恐怖打壓正義傳媒，理屈自然辭拙，今消防處回應養鯉魚，亦作如是觀。
講真，你哋豪養錦鯉就話「用以改善工作環境」，可是魚池失修漏水成年竟無人理，自己「改善工作環境」卻「影響他人生活環境」，這是甚麼邏輯？
消防員休息時如果真係欣賞錦鯉而達致「怡情」及「歸屬感」，又點會任由個池係咁漏水而完全視而不見？任由水自流魚自游，何來「歸屬感」？當年，貪曾在禮賓府建了個風水池養錦鯉，想用水來化外界金煞，結果，魚池變成禍水，佢禍港七年以權謀私；令香港廉潔蒙羞，養錦鯉都幫唔到佢改變貪腐污點！紅磡消防局唔好搬歷史上枱嘞，祈好自為之，咪養鯉為患了！