學民思潮前日先召開記者會，講來年發展大計，又發公開信畀四名政界人士，一心想自抬身價之際，點知尋日其中一名發言人劉貳龍就發聲明，話要喺未來尋找新方向及嘗試，即日辭任發言人。記得學民另一前發言人周庭，十月初佔領行動期間，都係發聲明話自己無法再承受沉重壓力，決定辭任發言人一職。點知相隔唔夠三個月，呢類事又再一次發生，睇嚟學民先要解決內憂先得喇。
劉喺聲明中話，前年五月加入學民，想帶來改變，依家身軀希望先作休息，再諗未來定位。佢回覆我哋查詢時話，將來或從事文字工作，學民媒體《破折號》係其中一個選擇。佢話唔係因為學民內部問題或學業壓力而走，同周庭呈辭亦冇關，會維持學民成員身份。
學民現時對外聯絡，只剩召集人黃之鋒同發言人黎汶洛，聽聞黎亦將決定退下火線，專注學業。咁搞法，唔知學民會否遲早解散呢？