政情：李漢奸 民主阿婆又被摑
港府今日向國務院提交民情報告，政改三人組亦緊接喺明日出席今年首次立法會大會，發表政改第二階段諮詢文件。正當全城關注香港民主發展之際，尋日就有個名為The Nation嘅媒體發表一四年全球民主排行榜，結果顯示香港排名上升至第十七位，僅次於美國。相信今次排名榜除咗為嚟緊嘅政改諮詢打下強心針外，更加狠摑經常話香港民主倒退嘅泛民主派，特別係經常到歐美「唱衰香港」嘅「李漢奸」民主黨創黨主席李柱銘及「民主阿婆」前政務司司長陳方安生。
排名升至十七 亞洲之冠
民主排行榜顯示，去年全球民主排名順序為挪威、瑞士、瑞典、芬蘭、丹麥、荷蘭、新西蘭、德國、愛爾蘭、比利時、奧地利、澳洲、英國、加拿大、法國；美國就繼續停留喺第十六位，但香港就緊隨美國排第十七位，上升咗一位，係亞洲國家中排名最高，更拋離部分歐洲國家，相信令唔少泛民人士大跌眼鏡。
除咗民主排名，今次調查亦統計咗各國嘅民主進程，首五名位置主要由北非及西非國家佔據，順序為突尼斯、尼日爾、科特迪瓦、畿內亞、塞內加爾，其餘包括埃及、格魯吉亞、贊比亞、泰國及肯尼亞。報道話，調查係利用超過四十項指標，計算全球一百一十二個國家嘅民主排名。計算範圍除牽涉政治層面，亦涉及非政治層面，例如性別、經濟、知識、健康及環境等。
記得李漢奸同民主阿婆去年曾經去過美國同英國「唱衰」香港民主發展，雖然佢哋喺英國國會外交事務委員會聽證會被當地議員噴到一面屁，亦曾被英國政壇專用智庫駐港高級研究員嘅評論報告隔空反駁，但二人似乎仲未心息。雖然今次民主排行榜係由泰國媒體The Nation發表，並唔係美國雜誌The Nation，但公布嘅調查無疑係再狠摑多李、陳兩人一巴，但就唔知摑唔摑得醒佢哋喇！