土地資源緊缺，港府話要「寸土必爭」；而大學學額僧多粥少，港府係咪要「寸位必爭」吖？呢，當局計劃下學年起增加六百個資助學額，無疑係杯水車薪，但總算係聊勝於無。
係咁嘅，八大院校近年招收愈來愈多非本地學生，搞到唔少本地學生望門興嘆，怨聲載道。可能知衰嘞啩，港府準備由二○一六學年起，將每年一萬五千個資助學額全數招收本地學生，至於之前收開嘅百分之四非本地學生，就要透過資助學額以外嘅超收方式錄取，涉及約六百個學位。
即係咁，本地學生升大學爭崩頭，學額梗係多多益善啦，以舊年文憑試為例，二萬七千多名合資格升讀大學嘅學生，只有一萬四千幾人如願以償，即係話仲有萬幾名學生被大學拒諸門外，家陣淨係增加區區六百個學額，你話係咪杯水車薪吖。
所以話，要解決本地生升學問題，淨係靠小修小補唔掂嘅。其實，增加大專學位辦法有好多，問題係當局有冇決心同魄力啫。就講非本地生學位吖，除咗上面提到嘅六百個係直接從本地生手中搶走，其實仲有二千幾個透過院校超收方式取錄。所謂超收，簡單嚟講係院校自負盈虧自行取錄非本地生，表面上唔會同本地學生搶位，實際上係分薄咗院校資源，最終受損嘅都係本地學生。再講吖，外地生同本地生嘅唯一分別，只係前者學費要收成本價，如果港府真係有心協助年輕人升學，大可以直接將超收學額轉為資助學額，優先照顧本地學生。以學費十萬元計，港府每年額外承擔只係幾億元，九牛一毛啫。
真係諗極都唔明，港府坐擁金山銀山，點解始終唔肯增加大學學額。不可不知，「寬進嚴出」係發達國家同地區專上教育嘅大趨勢，各地無不想盡辦法為年輕人提供專上教育機會，好似美國咁，大學入學率四十年前就已經達到五成，鄰近嘅台灣更加超過九成添。反觀本港，長期不足兩成，同好多第三世界國家差唔多咋，簡直羞家。
當然，話又講番轉頭，唔係話唔可以收非本地生，香港話晒係國際城市，招生國際化都好正常啫，但前提係照顧好本地學生嘅升學需要。港府一味好高鶩遠，自己人都未顧得掂就掛住收外地生，未學行先學走，唔亂象叢生至怪喇。
始終都係嗰句，一分耕耘一分收穫。廿一世紀最寶貴嘅資源係人才，港府唔肯增加教育投資，整體競爭力有咩法子唔好似王小二過年咁，一年不如一年吖。