英國《泰晤士報》將黃毛小子封為「年度青年」，之前美國《時代雜誌》又把「絕食騙全球」嘅大話精推為「風雲人物」；黃毛小子呢位「思想家」霎時「身價」暴升，風頭一時無兩。
同文指出外媒可謂居心叵測，無所不用其極把黃毛小子捧上天，即係鼓勵學生變相造反，如果咁都係「年度青年」，當年「造反有理」嘅千千萬萬紅衞兵，睇怕都是「風雲人物」加「年度革命青年」！孫中山、黃興、陳獨秀、黃花崗七十二烈士……算是老幾？
「少年得志大不幸」、「千金難買少年窮」——無非指一個人在年少時，因為窮、環境不佳，經歷過辛酸苦楚、挫折、坎坷才可以「野蠻」地生長，更容易成就美好的人生！然而，如今嘅黃毛小子及學聯等年輕人，一味放縱不羈愛自由，活在自己嘅世界，以為盲衝亂撞，佔領馬路、搞吓不合作運動就可拖垮政府，得到主觀認可嘅理想！黃毛小子更大言炎炎，在美國《紐約時報》撰文，食咗幾擔蒜頭咁話：「我想提醒香港統治階層的每一成員：今天你們剝奪我們的未來，但有朝一天我們將決定你們的未來。」
講真，一國兩制下，港人依然享受到唔少自由，你有本事，根本冇人可以剝奪你嘅未來，你自己唔爭氣，就只能讓「命運」決定你嘅未來！六四學運的當年頭頭，二十五年過去了，他們各有各的歸宿，有的活出彩虹、有的不知何去、有的在人生路上繼續徬徨便是最佳證明！
新的一年，老朽借卡爾維諾《巴黎隱士》幾句話贈予雙學諸君：我對任何唾手可得、快速、出自本能、即興、含混的事物沒有信心。我相信緩慢、平和、細水長流的力量，踏實、冷靜。我不相信缺乏自律精神、不自我建設、不努力，可以得到個人或集體的解放。