政情：公民講場：陳弘毅「冇米粥」 白費心機

基本法委員會委員陳弘毅近日力推「白票守尾門」方案，即係喺全港選民一人一票普選特首嘅階段，將白票計入有效票或增設「以上皆不是」選項，若果白票數目超過總選票一半，選舉就會無效，需要進行重選。雖然有高官同建制派都話該方案並冇違反《基本法》同人大「八三一」決定，但同時認為建議喺政治上同技術上都不可取。泛民更加表明絕唔會因為單單有「白票守尾門」機制，而「轉軚」支持喺人大決定框架下嘅政改方案。其中民主黨主席劉慧卿就話，明白陳弘毅嘅好意，但香港人要嘅係選擇特首人選嘅權利，而唔係否決權，暗寸陳弘毅煲緊冇米粥。