政情：社民連籌款宴 旺丁唔旺財
社民連（社記）尋晚喺旺角一間酒樓，舉行成立八周年酒會兼晚宴，會場內貼出嘅枱號去到成七十九號，令人以為社記支持者包起咗近八十張枱咁誇張，但睇真啲原來啲枱號好似某啲樓盤咁出現「跳層」，實質加加埋埋只有六十二張枱。有社記中人否認有人應頭買枱後臨時「甩底」，但又解釋唔到「跳枱號」嘅原因同準則。
傳僅籌得18多萬
社記除咗賣枱，即場亦有拍賣大量物品籌款，不過反應就認真一般。例如「阿牛」曾健成拎出印有「我要真普選」字樣嘅黃傘，開價一千元，最後幾經辛苦先氹到有人以四千元成交。另有一幅畫開價一萬元，有人想獅子開大口開出二、三萬元叫價，最終亦僅以一萬三千元成交。連帶以真金白銀入錢落籌款箱嘅在場人士亦寥寥可數，據聞最終實質僅籌得十八萬五千大元，旺丁不旺財。