佔領行動告一段落，唔少人事後歸咎青年人只識「兩制」、唔識「一國」，由政務司司長林鄭月娥擔任主席嘅基本法推廣督導委員會（基廣會）亦成眾矢之的，適逢四月四日係《基本法》頒布廿五周年，據聞政府早前低調委任至少四名親建制人士加入基廣會，公開大學校長黃玉山等人卸任，基廣會如日後推廣《基本法》都咁低調，就唔得掂嘞！
基廣會官方網頁去年底更新委員名單，黃玉山、油尖旺區議會副主席高寶齡等人卸任委員，取而代之係港區人大代表黃友嘉、基本法委員會委員莫樹聯、城市大學法律學院前院長王貴國等人，其中黃玉山即使卸任委員，仍然於電台節目大談青年人應該點理解「一國」、「兩制」嘅涵意，又話香港問題唔止係「香港問題」，更加係「中央問題」喎。
至於《基本法》頒布廿五周年有乜活動，消息指會大搞啟動禮，邀請內地嘉賓來港出席研討會，又會舉辦大型問答比賽、展覽等，有人更建議搞基本法大使計劃。基廣會初步似乎諗頭多多，效果如何有待時間驗證。