政情：陳家強「預」告冇糖派？
新年度財政預算案今年二月底揭盅，焦點之一肯定係財政司司長曾俊華（鬍鬚曾）會為預算案「加甜」定「減甜」，事關鬍鬚曾一時漏口風話樓市辣招「雙倍印花稅」令庫房進帳三百億元，其後又突然運用財技開設二百七十億元「房屋儲備金」，令市民對於政府係咪派糖感到十五十六。不過，同樣有份參與新一份預算案嘅財經事務及庫務局局長陳家強，就疑似提早為預算案吹定淡風，重新調整市民對於派糖嘅期望。
陳家強尋日出席電台節目時盤點香港經濟去年情況，首先大力唱好幾乎全民就業嘅勞動市場，但就話由於香港缺人缺地發展各行各業，因此無論國民生產總值（GDP）抑或經濟增長都難以再創高峰，預測去年經濟增長只有百分之二左右，情況值得關注，仲提醒市民低經濟增長可能成為香港發展新常態添。佢其後又提到，「房屋儲備金」係為配合未來十年公屋建屋目標而設，所以有需要時唔排除會增加撥款。
政治爭拗礙長期發展
另外，「後佔領時期」嘅經濟後遺症同時陸續浮現，陳家強於電台意有所指，形容政治爭拗唔會影響短期經濟，反而係窒礙長期發展，又話香港仲有好多民生問題要解決，若果政治爭論見唔到成果，大家應該將時間用喺更好嘅地方喇。
其實陳家強以上吹淡風嘅論調，同前年成立嘅長遠財政計劃工作小組時嘅主張差唔多，同樣係就算政府短期內財政充裕，長遠亦冇可能保證年年有餘，所以先出現「結構性財赤」概念，疑似為鬍鬚曾閂水喉鋪定後路。由此睇嚟，預算案中嘅一次性紓困措施都係有限，開倉派糖「加甜」就更加唔使講，鬍鬚曾盒糖來年似乎都係有得睇，冇得食居多嘞。