中環出更：選下任特首？肥亨自稱「三無」

「泛民議員係佔領大輸家」

商務及經濟發展局前局長馬時亨（肥亨）被視為其中一個想選特首嘅有心人，一七年將年屆六十五嘅肥亨話，自己係「三無人士」，即無意、無計劃、無打算，當問及「三無人士」會有人補貼或有人幫手，肥亨則話到依家都仲未見到喎。

肥亨其後點評持續近兩個半月嘅佔領行動，認為埋單結帳政府係「小勝」，泛民議員就係「大輸家」，事關佔領行動最低限度冇引起好大騷動、甚或宵禁，政府處理得都尚算可以，但佢同時表明，市民好現實，未必會支持政府未來兩年半施政，所以暫時唔好開心得咁早。

至於泛民，肥亨形容佢哋喺整場運動中，既唔係走得最前，又起唔到作用，「有少少進退失據」，仲聲言無論如何都會否決政改，佢覺得咁樣未必係最明智嘅一步，若泛民唔跟民意「袋住先」，一年多後嘅立法會選舉，話唔定會輸得好厲害，到時連議會否決權都輸埋。

卓妮