告票錯漏連篇 食署死撐有效
告票資料一錯再錯，食環署仍「零檢討」！有市民被食環署票控亂拋垃圾，卻發現告票上的事發街道名稱、燈柱編號及被告人中文姓名電碼均告出錯，食環署接獲市民反映後僅修改部分錯誤了事，未有就出錯解釋，更強調告票出錯不影響法律效力。立法會議員狠批食環署處事輕率，不但嚴重影響執法公信力，連番出錯亦需動用人力物力糾正，變相浪費公帑。
「根本就冇『嶺山街』呢條街，連個街名都係作出嚟，你話有冇離譜啲？」施先生（化名）早前在將軍澳嶺光街被食環署職員檢控隨地拋棄紙巾，接獲告票後卻發現資料多處出錯，「街名錯，中文電碼又抄漏四位數字，仲有嗰日我泊低架車喺條燈柱隔籬，所以我肯定事發地點根本唔係告票寫嗰條燈柱，食環署啲人係咪諗住抄啱名同電話，搵到我交錢就得？」
發言人無明確交代錯漏原因
施即時致函投訴，食環署回覆時僅修訂告票部分資料，卻未就出錯解釋，更重申證據充分，要求施在告票發出廿一日內繳交罰款，令施大表憤怒，「告票係執法憑據，依家改咗就可以當冇件事，點解可以咁求其？仲要淨係改咗街名同中文名電碼就算，個燈柱編號都仲係冇改過，咁究竟係我搞錯，定真係佢哋錯都應該交代吓啩？」
食環署發言人承認，職員發出「定額罰款通知書」時，不慎誤寫部分資料，其後已發出修訂信件，強調有關修改將不會影響法律效力，違例人士仍須在限期內繳交罰款。不過，發言人仍然未有說明沒有修改燈柱編號的原因，亦無提供近年告票出錯的統計數字，僅稱當局有向執法人員提供填寫「定額罰款通知書」的守則及詳細指引，亦已就事件訓示有關人員必須謹慎填寫及覆檢內容。
律師：連番錯誤影響法律效力
「法官可能會接納一次手民之誤，但錯幾個地方，就可能會質疑食環署執法係咪好混亂，甚至究竟係咪有件咁嘅事！」律師黃國桐指出，食環署雖有權修訂告票，但如市民就告票出錯抗辯，法庭亦會傳召涉事職員解釋事件，而告票連番錯誤有機會影響法律效力。
立法會議員麥美娟直指事件匪夷所思，斥責食環署處事兒戲，不但有損公信力，亦浪費社會資源，「食環署甩漏成咁，市民被罰好唔忿氣，下下搞到庭上解決嘅話，市民又要請假、抄牌個職員又執唔到勤，食環署又要做一大輪文書工作，法庭本身又要用公帑，真係好嘥人力物力！」
（ireport_00039162）
記者：呂耀焜