正所謂，百足之蟲，死而不僵。雖然佔領行動已經落幕，但幕後黑手唔甘心失敗，「鳩嗚」兵團搞到雞犬不寧唔在講，金鐘添美道嘅帳篷仲不斷增加，設施應有盡有，發展到「村落」咁款，佔領行動分分鐘死灰復燃o架。
嗱，帳篷陣篤眼篤鼻，隨時殺入立法會示威區，當局究竟有咩應對措施呢？係咁嘅，立法會行政管理委員會下周將開會討論，據講準備咗十幾項「辣招」，包括限制示威者逗留時間、禁止攜帶帳篷等寢具，以及喇叭唔可以對正立法會大樓等。
即係咁，立法會示威區冇錯係公眾地方，市民亦有表達意見嘅自由，但唔代表示威人士可以打橫行，更加唔代表可以長期佔領，賴死唔走。可惜吖，立法會話就話有應變措施，之但係佔領人士易請難送，到時清唔清到場，真係未可樂觀o架。呢，有泛民議員事先張揚，話有關措施係「斬腳趾避沙蟲」，又話示威者即使唔佔領示威區，都可以喺外面露宿喎。照咁睇嚟，即使有幾多「辣招」都係嘥氣嘅啫。
可能有人會話，立法會搞唔掂，大可以請警方出手啫。本來就係嘅，可惜今時今日警方自己都顧唔掂自己喇。早前清場嘅時候，已經將牛鬼蛇神一網打盡，點知跟手又放虎歸山，簡直匪夷所思。所以話啫，立法會之所以搞到兵臨城下，畀佔領大軍重重包圍，咪就係因為警方執法不嚴囉。
其實，無論「鳩嗚」又好，「跌錢」又好、「報佳音」都好，擺明玩流動佔領，嚴重滋擾市民，但警方係咁意驅散就算，唔怪得示威者有恃無恐喇。家陣添美道帳篷陣遍地開花，當局仲係視若無睹，聽之任之，佔領行動唔死灰復燃至奇吖。講到底，皆因當局長期縱容，有法不依，幕後黑手及滋事者以為違法零成本，先至為所欲為咋！
真係諗極都唔明，一場佔領鬧劇，牛鬼蛇神通通現形，反對派政客同幕後金主嘅亂港奸計路人皆見，佢哋搞到香港烏煙瘴氣，經濟受損，法治崩壞，市民早就要求港府嚴正執法，還社會安寧清淨，可惜當局一味放軟手腳，到底係無能為力定係有心放生？有人話港府內部充斥無間道，有人暗中勾結佔領搞手，似乎唔係空穴來風。
點講都好喇，佔領黑手政治目的一日未達成，一日都唔會罷休。正所謂，「何為邪鬼何為神，神鬼如何兩不分」，政改第二輪諮詢啟動在即，反對派肯定要「玩鋪勁」，睇吓港府又點樣收拾殘局！