大律師公會今個月就會換屆，現任主席石永泰做咗兩屆，按慣例會退下火線，引來唔少人「估領袖」，諗緊邊個做接班人。我哋收到消息，話公會已經向所有大律師發出通訊，公布邊個有興趣競逐公會各個職位，其中主席一職，就只有前副主席、現任執委譚允芝（Winnie）有興趣，意味佢如無意外會成為公會十六年來第一位女主席。
Winnie主打知識產權法，一九八四年成為大律師，師從高等法院法官包華禮，同門師弟係律政司司長袁國強。佢係高院特委法官，二○一一年就政府推出「遞補機制」，佢喺公會都有份出聲明反駁政府，接替做主席都可以理解。
另外，有人話佢嘅前夫原來係基本法委員會委員、主打憲法及行政法嘅莫樹聯（Johnny），兩人育有一對子女。兩人現同於德輔大律師事務所執業，仲咁啱得啱蹺，喺○六年一同獲委任為資深大律師。Winnie予人感覺較為開明，支持民主自由，同Johnny有啲唔同，唔知Winnie上任後，兩人有冇機會就政改、《基本法》等議題討論呢？