政情：釋智慧訪談甩底：冇咩好傾
寶蓮禪寺尋日舉行天壇大佛開光廿一周年紀念暨水陸息災法會開幕典禮，為香港市民祈求身心健康、社會繁榮，好多善信及政界人士都去參與盛會。方丈釋智慧法師親自主持，雖然佢近年身體欠佳，但睇落精神唔錯，即使行路時要用拐杖，但都算行得好快，只係上落樓梯時要人攙扶。原本佢於儀式後會接受傳媒訪談，但儀式完結後，釋智慧同嘉賓一樣玩快閃，唔知係咪臨時有咩急事呢？
隨後我哋喺寺內搵到佢，於是問佢可否傾兩句。釋智慧安坐椅上，好淡定話，冇咩好傾喎，仲話佢講嚟講去都係嗰幾句咁話。既然法師冇嘢講，咁又做乜事先將訪談寫落發畀傳媒的採訪程序表呢？寺方只係話法師仲有儀式要做喎。而釋智慧就話，係唔想阻傳媒落山！唔通法師以為傳媒大費周章上山，目的係趕住落山？