政情：白鴿難保中西區巢穴

以專業中產選民為主嘅中西區過去一直係白鴿黨根據地，但建制派過去靠力捧無黨派「獨立」人士出選，又搵第二梯隊死守地區深耕博反彈，加上委任議員多屬「自己友」，因此近年已收復唔少失地。不過，隨着區議會下屆起取消委任制，委任議員都要另謀後路，其中文志華及吳少強，雖然未知會否搵位出選，但就力撐區內靚女牙醫劉尉欣硬撼乳鴿許智峯；而同屬委任議員嘅區議會主席葉永成更擬取代林懷榮出戰寶翠選區，以延續議員生涯。

內部老嫩疑唔咬弦

早前有傳激進乳鴿許智峯同黨內走溫和路線嘅老鴿唔咬弦，老鴿亦唔肯隨傳隨到為四處佔領政府部門嘅許智峯撐腰，而目前除咗老鴿鄭麗琼，另一老鴿黃堅成已盛傳做埋今屆就收山，部署由乳鴿女將伍凱欣接捧，淨返老鴿甘乃威仍然去向未明。假如老鴿走晒，乳鴿又入局失敗，名副其實係「一鑊熟」。即使許智峯連任，喺區議會更勢弧力弱，做硬孤兒仔。

傳網民出戰西營盤

建制派一方面冧友挑戰白鴿，但同時間喺佔「鐘」清場被捕嘅立法會議員梁國雄助理、社民連成員黃永志亦傳有意喺西營盤「插旗」對戰老將陳財喜。佔領行動過後，一直盛傳要狙擊建制派嘅網民，亦有意派人落戶西營盤挑戰民建聯議員盧懿杏，由於該區係中方嘅敏感地帶，網民出戰該區可謂極具戰略意義，唔知建制派會使出咩招數迎戰呢？萬一西營盤失守，後患無窮，到時真係唔知邊個負責嘞。