中環出更：鬍鬚曾婉拒開會 報復泛民？
財政司司長曾俊華（鬍鬚曾）每年年底都會去立法會財經事務委員會簡介香港經濟狀況，順便聽吓議員對《財政預算案》嘅意見。不過，今年就有啲例外，事關七十幾日嘅佔領行動一度癱瘓政府運作，就連通往立法會嘅添美道都被堵塞，搞到鬍鬚曾去立法會嘅安排都被迫取消。委員會最近打算補開會議，並邀請鬍鬚曾出席，點知鬍鬚曾回覆話要講嘅嘢已經向公眾講晒，呢個時候諮詢已成效不大喎。
話再就預算案諮詢都冇用
財經事務委員會主席陳健波早就去信鬍鬚曾，問吓有無需要重開會議。點知鬍鬚曾早幾日回信話，雖然當日會議取消咗，但佢已經係同日召開記者會，算係及時向市民發布咗關於香港經濟前景嘅數據。佢仲話，《施政報告》同《財政預算案》都就嚟公布，再次就預算案諮詢未必有特別成效。雖然係咁，如果議員想開會佢都樂意配合嘅，搵機會再做簡報喎，變相婉拒重開會議嘅要求。
每逢開會都係泛民「開騷」時間，通常都找緊機會大鬧特鬧，相信鬍鬚曾都心中有數，所以先婉拒開會要求。話時話，泛民有份搞佔領行動，算係搞到開唔成會嘅元兇之一，唔知鬍鬚曾婉拒開會算唔算係玩報復呢？
卓妮