中環出更：廠商會夜宴「家和」人人賀
中華廠商聯合會（廠商會）新班子已在元旦正式上任，一班會董就喺上屆最後一次會董會議之後，拉大隊舉行晚宴為前會長施榮懷（Irons）餞別。卓妮都有去趁熱鬧，期間見好多人同廠商會常務會董黃家和（Simon）道喜，細問之下，原來Simon將接替現任主席陳淑玲（Shirley），出任品牌發展局主席，難怪個個都戥佢開心。
Simon笑笑口話，任期將於明年四月生效，但呢幾個月都冇得偷懶，事關要開始搵班底。Shirley就話，Simon做咗品牌局副主席多年，喺商界歷練又極豐富，想搵業界叻人埋班梗係難唔倒佢喇！咁Shirley卸任後多咗好多時間，最想做乜呢？唔通係佢啱啱獲政府委任的復康會成員工作？Shirley笑笑口話，冇錯，因為佢係首次加入，所以會畀多啲心機為殘疾及復康人士做事。
忙於埋班嘅仲有仁愛堂副主席史顏景蓮（Kimmy），佢話原本應該升呢做主席嘅副主席決定唔接棒，所以決定由佢擔大旗。不過，由於決定太倉促，令佢辛苦忙於組班，唔止聖誕元旦假期冇得出埠玩，連三月打算同朋友去塞浦路斯旅行嘅計劃都泡湯，但為咗做善事都唔緊要啦！
施榮懷依依不捨
即將離開廠商會的男主角Irons，佢話加入廠商會共十三年，覺得依依不捨，卸任後將畀多啲時間睇番自己生意，努力搵真銀咁話。
卓妮