今時今日嘅香港，百物騰貴居不易，衣食住行樣樣難，尤其係「N無人士」，更加係度日如年。不過咁，耐不耐都有啲小恩小惠嘅，扶貧委員會宣布關愛基金再次向「N無人士」發放一次過津貼，總算聊勝於無喇。
即係咁，扶貧會去年推出「非公屋、非綜援低收入住戶一次過生活津貼」，反應唔錯，今年再接再厲，仲將金額加碼添。合資格嘅一人住戶可獲發四千元，二人住戶獲發八千元，三人住戶獲發一萬一千元，四人或以上住戶則獲發一萬三千元。整個計劃耗資四億六千萬元，預計有五萬三千戶即十二萬六千人受惠。關愛基金專責小組負責人聲稱，雖然無計劃將津貼項目恒常化，但保證唔會被政府日後推行嘅低收入在職津貼取替，叫「N無人士」放心咁話。
係人都知，「N無人士」冇綜援、冇公屋，只能租住劏房、工廈、寮屋呢啲環境惡劣嘅地方，係亟需幫助嘅一群，有津貼當然好過冇津貼。之但係長貧難顧，一次性派糖始終唔係辦法，派得一時，唔派得一世，要真正解決貧窮問題，唔可以靠呢啲小恩小惠。講到底，在職貧窮之所以日趨惡化，「N無人士」之所以日子難捱，根本問題在於產業結構太過單調，唔係炒樓，就係炒股，基層市民就業選擇有限，收入冇辦法提高，想脫貧都幾難。
正所謂，有頭髮邊個想做瘌痢吖。「N無人士」又好，在職貧窮人士又好，有手有腳，有氣有力，無非想自力更生啫，你估真係咁稀罕呢啲小恩小惠咩。港產官僚出名涼薄縮骨，好似前朝貪曾政府咁，直情唔承認香港貧富懸殊問題嚴重，卒之搞到窮人愈來愈多，貧富懸殊冠絕全球發達經濟體。現屆政府話就話撥亂反正，仲制訂貧窮線添，點知來來去去都係得派糖一道板斧，聊勝於無嘅咋。
話時話，港府咁多年來累積派糖超過二千億元，貧窮人口一樣有增無減，證明派糖根本解決唔到問題。其實，港府窮得只剩下錢，儲備早已超出合理水平，當局係咪好應該將財富再分配，造福市民呢？弊在身為政府大掌櫃嘅鬍鬚曾一毛不拔，寧做守財奴都唔幫助基層市民，仲話儲備愈多愈好喎，簡直九唔搭八。
古人話，朱門酒肉臭，路有凍死骨，香港都係差唔多咋。嗱，估錯數當食生菜嘅鬍鬚曾最近一反常態，預測未來三年「年年有餘」喎。既然係咁，唔該負責任啲，唔好再咁孤寒，好好制訂長遠扶貧政策喇！