政情：靠把聲借到錢？ 謎團破解
一打開電視及報紙，滿是財務公司鼓勵借錢嘅廣告攻勢，財務公司電話傳銷亦多不勝數，呢頭有人話只需電話及身份證就借到錢，嗰頭又有人話連身份證都唔使，靠把聲就借到錢嘞，講到易過借火咁款。
會查信貸紀錄
實情真係咁簡單？早前我哋喺酒會上見到保良局前總理兼亞洲聯合財務董事總經理張炳煌，細問之下，原來呢啲只係廣告技巧啫！
張炳煌話，財務公司嘅競爭太激烈，所以賣廣告要夠出位，先至可以吸引市民上門借錢。
雖然話就話靠把聲就借到錢，查實係有附帶條款嘅。市民打電話上去之後，第一件事係要提供身份證號碼，事關財務公司會先查閱借貸人在信貸資料庫內嘅信貸紀錄，若市民往績唔好，都未必獲批貸款，所以財務公司借貸係好審慎嘅，唔係想借就借到。