有「丐幫」之稱嘅社民連（社記），雖然只得主席梁國雄（長毛）一個立法會議員，但佢已經係社記嘅「生招牌」，每次遊行示威都籌到唔少錢。
社記今個星期六將會喺旺角一間酒樓搞周年籌款晚會，但由於長毛同副主席黃浩銘早前被控違反旺角清場禁制令，被法庭頒令禁足旺角一帶，如果兩人聽話唔去旺角，就無得出席晚會，估計籌款額大打折扣。不過，如果佢哋違反保釋條件照去，就會被即時收押，唔知佢哋會點做呢？
社記副主席吳文遠話，原先佢哋係喺十一月舉行周年晚會，仲連訂金都畀埋，但因為佔領行動，社記已經兩度押後晚宴日子，加上佔領行動已經結束，亦係時候搞返晚會，唔可以再延期喎。
至於被禁足旺角嘅黃浩銘就話，佢會聯同長毛去信裁判官，申請籌款晚會當晚照去旺角參加晚宴，睇吓裁判官批唔批准。如果裁判官唔批准，佢哋係咪會違禁令照落旺角呢？黃浩銘話未諗下一步行動，一切都會見機行事喎。