政情：吳得掂又外訪心虛變心寒
今年可說是航空業不幸之年，其中馬來西亞更係重災區，如馬來西亞航空（馬航）及廉航亞洲航空，就接連發生客機意外。教育局局長吳克儉（吳得掂）早前被立法會議員葉劉淑儀提出質詢，批評佢頻頻外訪，但佢冇有怕，據聞會喺特首發表《施政報告》之前一個星期，再去多一次外訪，而且仲係搭馬航添，令佢驚到震騰騰。
話說吳得掂下周三會去東盟大國之一嘅馬來西亞，一連兩日拜會當地教育部，又會去當地大學演講。至於點解佢揀搭馬航呢？據悉佢向來訂開國泰航空，但因為航班時間唔夾，要佢喺馬國留多一晚，為咗費事被人話佢用多一日納稅人金錢，所以焗住改搭馬航，早機八點鐘出發，晚機十一點鐘返香港。
據講吳得掂內心都有掙扎過去唔去好，近日仲重新考慮去唔去添。不過，當知道馬國方面盛意拳拳，一早準備晒啲嘢，佢都無謂為咗少少風險而推卻，所以最終都係決定如常展開旅程。
冀與東盟國拓教育聯繫
咁點解吳得掂對馬來西亞咁情有獨鍾呢？據了解，佢覺得東盟國家發展一日千里，一直都好想同呢啲國家喺教育方面建立關係。
好似有二億多人口嘅印尼，係東盟之中人口最多嘅國家，吳得掂曾經多次拜訪當地，認為當地好多尖子去咗日本東京大學、新加坡國立大學等頂尖學府，但係其實香港都可以成為佢哋其中一個選擇，所以多次走訪當地。
據知教育局近期又會安排印尼中學同香港中學結成姊妹學校，仲搵埋保良局拉線，邀請當地中學來港簽訂諒解備忘錄，局方仲諗住大搞一場「印尼周」添！另外，吳得掂仲對人口第二大國印度都有興趣，下一步就諗住去印度外訪喎。雖然吳得掂對教育好有心，外訪亦係為咗香港嘅長遠教育，但咁樣就好難洗脫經常外訪嘅形象，都係嗰句，其實每次外訪公幹係咪真係需要局長親自出動呢？