前政務司司長許仕仁貪污罪成被判囚七年半，有案在身嘅煲呔曾代為求情，其理由提到「法庭判刑時如沒有考慮被告對香港的貢獻，則公義便不能得到彰顯」，有聽眾在電台嘅「烽煙」節目反問貪曾：「甚麼是公義？」
這真是問得好，貪曾自己「貪遍省港澳」，對於「老鼠看倉，金庫盜光」嘅事，反正已經麻木，至於「沙煲兄弟」肥龍嘅貪腐，所謂「私生活如何則是其個人選擇」；換言之，貪曾「歎盡海陸空」，同啲富豪勾勾搭搭，坐私人飛機、遊艇逍遙遊、黐飲黐食，又出席「江湖飯局」、「朋友價」租住頂級豪宅……
依其「邏輯」，亦其「個人選擇」喇？一個人無恥最無敵，貪曾完全唔記得做得公務員，尤其是堂堂行政長官，「食相」如此難看，如此令政府尷尬蒙羞，如此周身污點嘅「爵士」，好心佢仲斗膽出來廢噏「甚麼是公義」？從貪曾為肥龍撰寫嘅求情信，可見其個人操守之低下，其「個人選擇」完全漠視公務員最基本守則──「廉潔奉公」，難怪肥龍收受地產商利益而過着揮霍奢華生活，喺佢嘅眼中都屬於「個人選擇」。
日本對於公務員用公家的東西都視之為大件事，是以公務員花政府嘅錢無不小心翼翼，哪有像香港某些高官動輒外訪，周不時「考察」，花了幾百萬卻做不出一點成績，冇嘢嘅，人家有的是行之有效嘅監察制度，香港卻有的是「個人選擇」，如果不出事、不出亂子，那才是咄咄怪事！
好心啲香港高官，就算唔研究吓日本嘅《公務員倫理法》，都用心睇吓李彭廣《管治香港──英國解密檔案的啟示》，當知何以香港回歸後，貪腐層出不窮嘅原因！貪曾一日有「個人選擇」，香港廉潔只會萬劫不復！