政情：近十億揸手 廖偉麟等入市掃舖
香港樓市欲跌還升，東華三院總理廖偉麟（Jeffrey）今年就密密食糊，成功沽出多項物業，套現近十億港元。受美國加息陰霾影響，Jeffrey相信唔少業主會先沽貨再觀望，所以手上大把「茄薯」嘅佢，打算明年人棄我取，再度出手掃貨。
炒舖唔炒樓 免市民冇得住
Jeffrey話，今年最和味嘅投資係銅鑼灣一幢精品酒店，持貨一年，易手後大賺數億元。加上高價出售手上嘅商場物業，利潤豐厚，大可以疊埋心水過肥年。雖然政府出招打壓，但係Jeffrey仍然睇好香港樓市，首選九龍及元朗區一帶商場舖位，貪佢仍有上升水位，至於近年熱炒嘅觀塘區工廈都有升值潛力。Jeffrey自言炒樓好少損手，不過佢一定唔炒住宅，因為唔想炒起住宅樓價，搞到升斗市民無樓住喎！