政情：工黨抽水博「破蛋」 鬥 工記「王」淡定迎戰
區議會選舉明年舉行，因應香港近幾年政治氣候嘅演變，多個政黨都各自有其如意算盤，其中工聯會（工記）同工黨都係主打勞工權益，代表顏色亦係橙色，因此自工黨成立以來，兩黨關係一直勢成水火。原來選戰率先喺東區爆發，莫非工黨欲借佔領行動議題「抽水」抽到盡，有意硬撼工記老將實現區議會零的突破？不過，睇怕呢個只係工黨大想頭兼一廂情願喇。
一二年成立嘅工黨以至其姊妹工會職工盟過往出戰選舉成績麻麻，職工盟一一年協調李卓人等三人出選區議會更係全軍覆沒，只專注政治議題、地區工作交白卷肯定係「死因」之一。不過，工黨喺佔領行動極為落力，李卓人等工黨核心成員更磨爛蓆留守至最後一刻成功「博拉」，工黨眼見上到位，得到泛民支持者力撐，唔爭在打蛇隨棍上，派人落區力爭至少一個區議會議席。
何秀蘭帶領兩「小將」硬撼
工黨率先安排由何秀蘭（Cyd）領軍，帶領黨內兩位年輕幹事麥德正及曾國輝落戶東區小試牛刀，硬撼工聯會上耀東區議員趙資強（趙Sir）同興東區議員許林慶，更將二人嘜頭孖住Cyd通街貼，增加區內知名度。不過，趙Sir紮根東區多年，加上工記地區實力亦一向唔係省油的燈，工黨借佔領行動派人出戰公屋選區可謂註定「送死」，領軍嘅工記立法會議員王國興亦歎住茶，淡定迎戰。
工記南區派出小花求突破
工記接受工黨嘅正面抽擊，但本身喺區議會坐擁三十一席嘅工記亦要為自己打算，隨着下屆委任制取消，工記委任區議員亦要執生搵區出選，據知工記明年計劃挑戰民主黨南區黃竹坑選區議員徐遠華，更繼派出小花陳穎欣挑戰馮檢基後，派出另一個名差唔多讀音嘅小花、即兼任南朗山道熟食市場關注組成員嘅陳榮恩單挑徐遠華，有望喺南區實現零的突破。不過，挑戰對手之餘，小心後欄失火呀！