中環出更：高佬賢叫政府多「種楓」
每逢秋冬時份楓葉由綠轉紅，總有唔少賞楓人潮。港人近年興起去日韓睇紅葉，去唔到嘅就近近哋去元朗大棠郊野公園睇，令到當地成日逼滿晒人，附近交通亦十分擠塞。早前立法會議員何俊賢（高佬賢）同陳恒鑌（Ben）約埋去大棠行山兼睇紅葉，兩人不約而同話，既然港人咁鍾意睇紅葉，政府不如喺其他郊野公園種多啲楓樹，市民咪唔使逼得咁辛苦囉！
分散人流兼創新景點
阿Ben話，香港種楓樹嘅地方唔多，有啲地方只係得一兩棵，營造唔到漫山遍野紅葉嘅浪漫感覺，咁無可避免令有多啲楓樹嘅地方交通變得擠塞。高佬賢就建議，政府不妨參考外國嘅做法，喺唔同嘅郊野公園種多啲楓樹，一來可以分散人流，二來可以創造新旅遊景點，咁市民就可以去唔同地方賞楓。
呢個建議聽落唔錯，不過香港嘅天氣愈嚟愈熱，要廣泛種植楓樹唔難，但係想楓葉變成紅色，似乎氣溫唔夠凍，除非啲楓樹有咁高種咁高喇！
卓妮