中環出更：盧偉國炒粉 惜食又好食
香港每日嘅廚餘量有過百架巴士咁多，想改善呢個情況，人人自身做起最實際。本地名廚鄭錦富（富哥）早前邀請一班惜食好友聚首一堂，入廚房鑽研環保菜式兼齊分享品嘗。立法會議員盧偉國即場炒咗碟廚餘米粉，獲一致好評，眾人更笑言碟米粉人工好貴喎！
經營食肆每日難免有廚餘，但只要巧妙使用，呢啲唔上得枱嘅食材一樣可以變美食。當日富哥就用常見嘅廚餘竹笙網包裹冬菇蒂及蘿蔔皮，製成一個個福袋形狀嘅小點心，又用隔夜油炸鬼製作生炒素排骨。有份品嘗嘅酒店及飲食專業人員協會榮譽顧問陳植漢、歷史博物館名譽顧問鄭寶鴻及香港餐飲聯業協會會長陳永安（Ken）試過都話精緻又好食。
飛邊唔環保 陳永安嗌唔好
盧偉國唔止炒得好味，揸鑊鏟時都似模似樣，可謂有姿勢、有實際。原來佢爸爸以前係曾經名聞一時嘅高級食肆告羅士打酒樓廚師，媽媽又係煮嘢好叻嘅中山人，所以盧偉國自細偷師唔少。講到減少廚餘，佢回憶話，小時候媽媽經常將冇人食嘅冬菇蒂搣成一條條絲，再將其炒香送飯或空口食都得，味道媲美瑤柱絲，係小朋友嘅搶手零食。
身兼太興集團主席嘅阿Ken就話，茶餐廳每日製造最多嘅廚餘就係麵包皮，所以食多士或三文治「飛邊」其實好浪費，亦好唔環保，奉勸大家下次落柯打時，不如唔好飛邊。佢依家出外食唔晒嘅食物，都一定會打包返屋企，實行以身作則，為環保盡一分力。
卓妮