五屆冠軍練馬師、上水鄉委會前主席簡炳墀（食力簡）自從上次賄選要受牢獄之苦後，一直低調，連馬場都唔多見佢老人家蹤影。不過，有名畀你叫做食力簡，當然唔會咁易收山唔玩啦。下月全港幾百條村將舉鄉郊村代表選舉，食力簡細仔簡永輝決定代父從軍，出選松柏塱村原居民村代表（村長），即係當年佢老竇發圍彈起嗰條村，睇落似乎有啲暗湧。
今次村代表選舉，食力簡改派阿仔出戰，但預計呢場仗應該唔易打，因為今次竟然有五人角逐，除咗簡永輝外，仲有黃偉業、劉應和、李漢樑、簡偉文，競爭相當激烈。原居民村長除咗可以處理丁權外，仲可以角逐鄉委會主席。當年食力簡就係先做松柏塱村村長，再贏埋上水鄉委會主席，先開始活躍政壇。今次食力簡可唔可以靠阿仔威番次，好快就知道喇。
如果簡永輝贏咗，分分鐘繼而參選上水鄉委會，咁咪同現任上水鄉委會主席侯志強（侯強）打對台？霸氣十足嘅侯強話，自己一早知道簡永輝想選，仲話已派人對撼。最後佢爆咗一句：「佢搞我，我咪搞番佢囉！」不過，侯強自己都有難關要過，就係要連任河上鄉村長，否則其他嘢都唔使諗嘞！