政情：麥美娟損喉嚨 入廠過冬至
因應聖誕假期，立法會即使疲於奔命應付「拉布」亦要年尾「收爐」抖抖，但立法會議員麥美娟（Alice）不但有病冇得抖，更因開會而延誤治療過濾性病毒感染，喉嚨同口都損晒，莫講話食嘢，連講嘢都成問題，要留院觀察三日，冬至都要喺醫院度過，可謂相當「難忘」。
掛住開會致延診
趕得切聖誕前出院嘅Alice透露，月初已經有感染徵狀，但食完藥好番所以無理會；直至上周三立法會最後一次召開大會又再作病，但為應付連日會議而延誤治療，結果醫生形容佢喉嚨已爛晒，打針食藥都唔掂，要留院治療。
曾經自嘲「盛女」嘅Alice，雖然今年未有男伴，但佢原定平安夜陪父親赴澳門出席喜宴，亦因為病毒突襲而取消。不過，Alice因為喉嚨吞唔到嘢食而要吊鹽水代替進食，唯一好處係住院三日已經減咗三磅，佢笑言呢個可能係今次入院唯一好處喎，認真阿Ｑ。