政情：今日你上鏡：玩毛巾操陳肇始忘形

一家人開開心心已是最珍貴聖誕禮物，食物及衞生局副局長陳肇始（Sophia）尋日趁Boxing day拆禮物日，出席沙田節賽馬會「愛＋人」家家康和樂嘉年華開幕禮。雖然Sophia無帶聖誕禮物派街坊，但就同義工及嘉賓一齊跳簡易毛巾操，教導街坊平日要多做運動，才能強身健體。不過，Sophia似乎忘記自己一身恤衫西褲，拎住條毛巾跳到忘晒形，連束入褲內嘅恤衫衫腳跌咗出來都唔知，建議佢下次都係着番套運動裝穩陣啲。