政情：新同盟抽佔領水 搶年輕票
黨員人數只有百幾人嘅新民主同盟（新同盟）日前舉行改選，十二人執委會不乏舊面孔，包括幾名盤踞新界東嘅區議員。不過，主攻年輕人尤其係網民選票嘅新同盟，就特別招攬前學民思潮成員、民主黨（白鴿黨）乳鴿，就連時下後生女最愛嘅「韓國勢力」亦唔放過，實行對年輕選民大包圍。新同盟唯一立法會議員范國威（Gary）更希望跳出新界東，二○一六年可以五區插旗，真係大想頭。
新同盟上周日與其「死敵」白鴿黨同日換屆，尋日特別拉埋新一屆執委同傳媒茶敍。因應佔領行動吸納咗一批明年起具備選民資格嘅「首投族」，新同盟當然唔放過抽水機會，積極招攬「有背景」年輕人進身執委會，包括前學民思潮成員古俊軒同埋啱啱先由白鴿黨過檔嘅湯子霈，另一名九十後執委陳兆陽更加係中韓混血兒，擺明引入「外國勢力」。不過，陳兆陽樣貌同「都敏俊」韓星金秀賢差好遠喎。
區選劍指新西
Gary更寸爆白鴿黨由立法會議員兼任黨主席，稱新同盟實行「黨政分家」，黨章規定立法會議員唔可以同時擔任召集人，自言只會留任當然委員，由年輕黨員揸弗咁話。不過，Gary似乎無懼泛民因佔領行動被建制派「搶灘」，話支持者「基本盤」冇變，只係兩派支持者兩極化啫，明年區選可望率先派人出戰新界西，首站落戶荃灣小試牛刀，若成績表亮麗先再下一城，決戰立法會咁話。
想吸「鍵盤戰士」
不過，有年輕網民揚言為牽制區議會內七十幾個自動當選嘅建制派而有意出戰，被網民封為「男神」嘅Gary亦不敢怠慢，直言佢哋由鍵盤戰士轉型為「街頭戰士」，新同盟會特別向佢哋分享選戰經驗，希望佢哋不但牽制建制派，甚至贏埋議席返嚟。唔知「男神」會唔會乘機招攬埋呢班網民入黨呢？