中環出更：單日堅仙人掌喻「咪亂掂」
尋日開始退休前休假嘅懲教署前署長單日堅，其辦公室嘅物品已於聖誕前收拾得七七八八。日前卓妮去到佢辦公室，見到除咗小量文件之外，就只係剩低部分相片及擺設。單日堅拎起窗旁一對圓圓嘅仙人掌，話擺放呢對植物喺辦公室原來都有特別含意，皆因仙人掌有好多刺針，寓意有啲嘢係唔可以亂碰，一觸碰就要付出代價。
「命令」家人 笑言有職業病
一對仙人掌中間仲擺放咗一幅古代傳說中能打鬼驅邪的鍾馗畫像，氣勢加倍。講到一定要帶走嘅物品，單日堅二話不說即刻拎起一個細小嘅外置儲存硬碟，事關佢話入面儲存嘅係佢多年來嘅珍貴照片，包括由細到大嘅相片及與同事嘅開心合照，真係有錢都買唔返。
服務懲教署足足三十五年，單日堅笑言會有少少職業病，有時返到屋企對住老婆仔女，都會不自覺地用咗命令式語句，好似「你過嚟呢邊！」等等，聽者可能覺得唔多舒服，但相信退休後應該可以變得溫柔啲喇！
卓妮