大埔醫院走失病人 不聞不問
大埔醫院早前竟發生「走失」病人事件！一名接受留院治療的精神病人擅自離開醫院逾二十四小時，家屬不滿院方對病人失蹤事件不聞不問，更未有提供協助，待家屬自行尋回病人，院方居然以「醫生開會」為由，拖延逾七小時始派員將病人接回醫院。立法會議員批評醫院欠危機意識，要求就事件檢討，並向家屬作詳細交代。
「嗰日阿爸同阿妹喺醫院樓下公園坐咗一陣，阿妹話要去廁所，跟住就唔見咗！佢明明着住病人衫，有乜理由咁易就走到出醫院？」劉先生指胞妹患有情感性分裂障礙症，自八月下旬入住大埔醫院精神科病房接受治療，劉父早前到醫院探望，並簽紙讓女兒到醫院的公園閒坐，未料劉女卻借故離開醫院，不知所終。
苦等逾七小時始獲接返
劉先生知悉情況後即時與醫院聯絡，院方卻只報警了事，未有進一步協助，「我哋同警察一齊搵通宵都搵唔到，到第二朝先見到阿妹自己返咗屋企！」劉即時通知醫院，要求盡快派員將胞妹送回醫院，卻一直未有回音，「問親佢哋都係話『醫生開緊會』，由朝早八點等到成下晝三點都冇人嚟，阿妹以前試過喺屋企用石油氣放火，有咩事上嚟我哋根本就搞唔掂，陣間佢衝咗出街傷到人咁點？」最終等候逾七小時後，醫院職員始聯同警方到場將劉女送回醫院。
大埔醫院發言人證實，有關病人早前獲家屬簽紙申請日間休假，每次一至兩小時，經醫生批准於下午二時三十五分離開病房，未幾家屬報稱與病人失散，職員已即時協助搜索，強調期間一直與家屬保持聯繫及代為報警。及至翌日早上八時許，院方知悉病人已回家，病人亦於下午四時四十五分由警察及精神科社康護士陪同下返回醫院。發言人又稱，過去一年該院共有八位精神科病人在回家度假或短暫休假後未有按時返回醫院，強調其後已全部返抵。
不過，劉先生卻指醫院的回覆不盡不實，「我阿爸簽紙嗰陣，醫生規定阿妹唔可以行出醫院半步，同埋佢哋一路都冇幫手，就算我哋搵到阿妹，佢哋都係懶懶閒，好不負責任！」
議員斥院方欠危機意識
「無論點都好，事實係有病人喺醫院範圍內走失咁多個鐘，醫院點都要負責，唔應該輕視個後果！」立法會衞生事務委員會委員麥美娟狠批大埔醫院卸責，直指事件反映醫院危機意識欠奉，要求院方檢討現有相關指引，並加強訓練員工遇緊急事故時的應對技巧，避免日後再出現同類情況，院方同時亦應向涉事病人家屬詳細交代事件。
記者：陳瑋珩