考考大家，平機會嘅宗旨係乜？冇錯嘞，之唔係消除歧視，人人平等囉。好喇，再考考大家，如果平機會其身不正，帶頭不平等，甚至黑箱作業，胡作非為，咁仲有冇存在價值呢？係嘞，呢個衙門醜聞不斷，早就應該摺埋喇。
嗱，自從前食衞局廢官周一嶽翻閹平機會主席後，平機會幾乎無日安寧，家陣仲衰到爆出「不平等」勞資糾紛添。件事係咁嘅，平機會前總平等機會主任束健銘，因為被指鼓勵教會人士去信平機會反對性傾向歧視立法，遭定性角色衝突，工作咗十八年亦不獲續約。本來呢，唔續約都冇咩大不了，跟足合約補償就得嘞，點知周一鑊竟然要求束健銘離職前簽訂不平等協議，規定唔可以對外發放平機會負面消息及就事件寫道歉信，先可以獲取八十多萬元約滿酬金喎。咁即係將約滿酬金當成掩口費啫，有冇再離譜啲吖？
聽吓當事人點講啦。束健銘話喎，佢曾經喺私人場合建議教友反對性傾向歧視立法，事關條例冇迫切性，爭議亦大，但強調絕無提供意見書範本供教會人士去信平機會。殊不知，七月佢突然接獲平機會通知不獲續約，後來更提出簽訂不平等條約添。如果話唔係秋後算帳，都冇人信喇。
好明顯，成件事係周一鑊自把自為，想點就點，擺明濫權喇。講真，如果周一鑊覺得下屬失職，大可按既定紀律程序處理，而唔係用威逼利誘呢種下三濫手段逼人封口。再講吖，《僱傭條例》規定僱主唔可以單方面不合理更改僱傭合約條款，否則僱員可提出補償申索。所以話，講多無謂，行動最實際，一於去勞工處投訴喇。
話時話，周一鑊被指濫權都唔係第一次嘞。係人都知，現行嘅反歧視條例只有四條，分別係《性別歧視條例》、《殘疾歧視條例》、《家庭崗位歧視條例》及《種族歧視條例》，點知周一鑊一意孤行，係都要為性傾向歧視立法進行諮詢，仲親自參加同志組織活動，周圍辣着火頭，唔止宗教團體不滿，法律學者亦質疑平機會越權。
咁仲唔止，自從周一鑊上場後，平機會就好似黃河決堤亂咁使錢，一三至一四年度足足使凸咗四百萬元，搞到入不敷支，你話佢係咪冇好帶挈呀？至於平機會提出為「族內歧視」立法，同埋將異性及同性關係「事實婚姻」納入保障範圍，更加係無風起浪，添煩添亂。
冇計啦，港府有眼無珠，係都要翻閹周一鑊呢個廢電池，平機會想唔烏煙瘴氣都幾難。計功夫茶話齋，黃台之瓜，何堪再摘，香港已經夠晒亂，平機會仲要無事生非，不如摺咗佢好過喇！