政情：話撐愛妻表演樹根放飛機
中華廠商聯合會尋日請咗一班建制派議員去工展會參觀同購物，立法會議員鍾樹根就帶埋太太出席。樹根話，雖然自己一向都唔會點買嘢，但每年都會帶太太行吓工展會，每次大約會用二千元買日用品、煲煲罉罉咁。唔好以為樹根太太年年買廚具，就會日日煮好餸畀樹根歎，樹根投訴話，太太淨係煲湯畀個女同女婿飲，搞到佢「呷醋」喎。
其實都難怪樹根無靚湯飲，事關鍾太前日喺尖沙咀星光大道表演唱歌，樹根本來答應撐場，仲話會幫手做攝影師添，點知樹根為咗去呂良偉生日會，竟然放飛機甩底，令鍾太大失所望。不過，作為背後嘅女人，鍾太都坦言話明白樹根好忙，以後會煲多啲靚湯畀佢補身。
黃定光工展買鮑魚麵
雖然樹根口講話「呷醋」，但佢兩公婆不知幾恩愛，樹根全程傍實太太，一見到社企有賣飾物同髮夾，就即刻買咗五隻送畀太太。樹根黨友黃定光亦大手入貨，購買大袋鮑魚麵、麵包粉及健康食品，收穫多到大叫「無力挽」喇！