政情：政總飯堂犯太歲？

行政署急搞問卷調查

我哋最近行過政總飯堂，發現行政署喺飯堂外設立咗個收集箱，就政總職員餐廳服務進行意見調查，叫同事最遲喺尋日填寫問卷，或用內聯網交電子問卷。問卷內容主要係問食客對餐飲選擇、質素，食物味道濃淡係咪適中、用料係咪新鮮、烹調技術係咪穩定、分量係咪足夠等。又問及餐廳服務，好似餐牌選擇夠唔夠、購票係咪方便、員工工作效率、衞生情況等，仲問餐廳喺十月上場後幫襯咗幾多次，或未幫襯嘅原因。

「太淡」「太濃」 意見紛紜

我哋問過多名食客，有人就話早餐選擇唔夠多，例如喺舊飯堂食開嘅番茄牛肉通粉，新飯堂就冇供應。不過，對於食物質素，意見就眾說紛紜，有人就話味道好淡，但又有人話好濃味，甚至有人話：「繼入口即溶嘅通粉、無奶油亦無烘過嘅奶油豬之後，最新力作係可以當做紙鎮嘅肉碎蒸水蛋！」不過，亦有啲人話，雖然食物有時唔太熱，伙記唔係太熟手，但質素都中規中矩。

其實政總飯堂兩個承辦商，一開業時都唔多好彩，一一年嗰次就面對退伍軍人症病毒，搞到要停業幾個月，生意跌咗一半，到今年九月約滿仲續唔到約添。到新承辦商十月初接手，相信大家都知發生乜事，政總呢幾個月面對示威者佔領，搞到老闆失晒預算，唔通真係政總風水唔好？據聞唔少公務員已「轉戰」附近嘅連鎖快餐店，或改往立法會餐廳開飯，睇嚟政總餐廳要認真睇吓今次行政署調查結果先得喇！