中環出更：立志「搵兩碗飯」黃傑龍童夢成真
好多人小時候都有夢想，但未必人人能夠達成。青年夢想實踐家協會日前舉辦首屆頒獎禮，透過嘉許成功實現夢想嘅人，鼓勵佢哋同年輕人分享自己達成理想嘅故事及經歷。有份獲獎嘅叙福樓集團執董黃傑龍（Simon），原來佢五歲時竟然想做世界領導人，但佢爸爸聽到後並冇打擊佢，而係叫佢努力啲喎。不過，夢想可以隨着歲月改變。
Simon話，記得約六、七歲時，喺蘇屋邨見到有個婆婆坐喺樓梯間，不知何故心生惻隱，問媽媽攞咗一堆散銀送贈婆婆，婆婆多謝佢時令佢感觸落淚。雖然當時佢哋家境一般，但回家後爸爸並冇鬧佢，只係話如果佢夠叻搵到兩碗飯，就可以分一碗畀有需要嘅人，但假如只得一碗飯，咁就大家都食唔飽。自此佢就立志要搵「兩碗飯」，仲入埋飲食業界添。
楊大偉娶靚妻「圓夢」
其餘得獎者仲有社企Green Monday創辦人楊大偉（David）、香港羽毛球代表「黑妹」葉姵延及有「神奇小子」外號嘅香港拳手曹星如等。David笑言，小時候夢想非常實際，就係想搵個靚嘅女朋友，而呢個願望唔單止如願以償，呢位女友現時仲成為佢嘅靚老婆添。
卓妮當日見評審團之一嘅大家樂集團主席陳裕光打咗條靚煲呔，原來佢細個受粵劇界「丑生王」梁醒波影響，愛打煲呔之餘，仲因為梁喺首本戲《光棍姻緣》中高唱「擔番口大雪茄咋，充生晒認經理噃」，於是立志做總經理。不過，佢圓夢後又有新目標，最近首次喺廣州設計咗棟建築物，而另一夢想就係抱夠四個孫，但呢樣就要靠仔女努力先得喇。
卓妮