孔夫子教落︰巧言令色鮮矣仁。真係一啲都冇講錯o架。香港郵政涉嫌違法滋擾東方報業集團，事件一拖再拖，日前至回覆話已經完成內部調查喎。可惜吖，呢個所謂調查一味遊花園，冇合理交代同道歉不特止，仲大玩卸膊，將個波交畀警方，唔係巧言令色又係咩吖？
大家應該記得，東方報業集團十月三十日收到一封已寄出兩個月、懷疑地址有誤而被退回嘅公文袋郵件，呢個被人拆開嘅公文袋內藏有另外九封同日寄出嘅信件，其中一封被人開封後再以膠紙封口。最荒謬嘅係，面對重重疑點，例如點解付足郵費、寫清地址嘅信冇被寄出，又例如點解有信件會被私自拆開，香港郵政並冇正面回應，淨係話涉及多個處理環節，調查需時較長及有一定難度喎，簡直九唔搭八。
咁都唔止，香港郵政耍完太極後，聲稱已經將內部調查所得交畀警方，現階段唔適宜進一步披露調查內容喎。咁即係擺明卸責啫，學者就講得啱嘞，香港郵政以為將個波交畀警方，自己就唔使負責任，唔使交代，其實咁做等同間接承認出錯，盞令市民對當局進一步失去信心嘅咋。
冇錯嘞，香港郵政以為咁就可以瞞天過海，蒙混過關，簡直侮辱市民智慧。正如有立法會議員話齋，成件事擺到明係香港郵政內部管理同營運出咗問題，最起碼都要同東方報業集團道歉啦。大家不妨諗吓，如果呢次係普通郵誤，香港郵政大可公布真相同涉事人員，並且公開道歉，點會好似依家咁鬼鬼祟祟，遮遮掩掩吖。
嗱，呢啲咪叫不近情者多藏奸囉。查實香港郵政自己都承認，郵資蓋印郵件同貼上郵票郵件混雜，以至曾被開啟郵件所用嘅膠紙唔係署方慣常用嗰隻，統統都係極不尋常嘅情況，家陣署方對內部調查結果秘而不宣，除咗可能涉及刑事成分之外，當中有冇更多唔見得光嘅黑幕甚至政治打壓，實在好難唔令人懷疑囉。
話時話，港府部門惡意針對正義傳媒，早就唔係新聞咯。消防處、衞生署、食環署、淫審處、平機會等等，輪流上陣，理由千奇百怪，估唔到依家連香港郵政都充當政治打手，簡直無所不用其極。當局黑白顛倒，是非不分，唔怪得香港烏煙瘴氣，亂象叢生喇。
一句到尾，公道自在人心。正義媒體頻遭打壓，新聞自由危危乎，早就惹起全城公憤，香港郵政咪使旨意不了了之呀！