渡海濠情：肖兔男生 易譜姐弟戀

第一位：兔男天生善良

據師傅講屬兔嘅男生由於心地善良唔會得失人，所以女士們如要譜姐弟戀最好揀屬兔嘅男生，大家包冇衝突，而且屬兔嘅都會冇乜主見，如果另一半能出謀獻策替佢哋指點迷津，佢哋不知幾咁受落，感情一定會愈嚟愈好。苗苗話：「我大表姐今年廿八歲，佢男友就係屬兔，乜嘢都聽晒我大表姐話，要佢去東就去東，去西就去西，所有錢都交晒畀大表姐，自己每日只攞一百蚊零用錢，但每個月仲會買到禮物送畀大表姐，你話咁好嘅男人去邊度搵！」

第二位：狗男忠心耿耿

屬狗嘅男生，天生就會對另一半忠心耿耿，所以無論另一半係乜嘢年齡，佢哋喺愛情路上都會堅持到底，好少會有失誤，除非另一半先放棄，所以師傅話女士們揀到屬狗嘅小弟弟做另一半嘅話，開花結果嘅機會肯定會大增。苗苗話：「我有個女同學就揀咗個屬狗嘅男友，佢哋不知幾咁合得嚟，雖然男方親友畀咗好多壓力佢哋，但佢男朋友就係喜歡我同學，不知令佢幾咁感動，而且年輕人有衝勁，據講床上運動特別有幹勁，令佢晚晚都高潮迭起添！」

第三位：牛男一心一意

最後嘅最佳選擇就係屬牛嘅男生，因為屬牛嘅男生一係唔愛你，一愛你就天打雷劈都唔會改變主意，所以女士們要譜姐弟戀，搵屬牛嘅做男朋友真係穩陣到極，但要小心，佢哋會幾悶吓，除咗對你好之外，其餘一啲驚喜都冇，決定搵佢哋之前認真要考慮清楚。苗苗話：「我以前嘅男朋友就係屬牛，我足足大佢五歲，同佢出街經常畀人笑，但佢就係由得人笑，做情人認真難得，但同師傅講嘅一樣，佢真係悶到不得了，最後頂唔順焗住要同佢分手！」

每周大吉生肖

異性運：鼠、虎、馬

桃花運：牛、羊

和合運：兔、猴、狗

苗苗Profile　　

年齡：22歲

三圍：35-24-35

撰文：小德　

攝影：阿昌　

玄學提供：寶源師傅