政情：「彬」走佔區 自言了解青年
佔領行動落幕後，踏入「後佔領」時代，青年政策肯定係政府施政未來焦點之一。被揶揄同年輕人思想脫節嘅青年事務委員會主席陳振彬（Bunny），極力否認批評，自爆曾多次「易服」到金鐘佔領區同後生仔交流，反指政府根本唔明白年輕人心事喎！
「易服」鮮被認出
Bunny話，政府內部一直誤判佔領行動源於青年福利不足，即所謂上樓難、冇前景等，但其實現今年輕人唔再停留喺「搵兩餐」就滿足，而係追求民主、自由、公平等等的精神價值，偏偏政府就捉錯用神，以為起公屋、派錢就得。
Bunny自言雖然年紀大，但同年輕人交流分分鐘比泛民議員多，又曾多次落金鐘佔領區同年輕人交流，只係每次都會戴番副眼鏡兼改以一身便服現身，「打躉」地點亦選址遠離物資站核心區，因此鮮有被認出或追訪喎！