政情：郭偉強靠工記締良緣
立法會議員郭偉強加入工聯會多年，不但獲工聯會保送出選勞工界議席，一六年更有望頂替王國興轉戰港島區直選。咁多喜事，都唔及佢明年二月初同女友Myolie拉埋天窗咁開心。郭偉強自言生活圈子窄，議會內外嘅朋友都係來自工聯會（工記），就連未婚妻都係靠工記做「媒人」先至認識。
我哋早前寫過Myolie係元朗區議員姚國威嘅妹妹，查實郭偉強係喺工記一場聯誼活動上邂逅女友，雖然男方當場已經中咗愛神之箭，但驚對方覺得佢猴擒而未有採取行動喎！兩人同工記咁有淵源，獲邀賓客自然唔少都係工記老友，到時婚宴分分鐘變成工記「會員大會」添！
街坊曾安排「相睇」
講起結婚，郭偉強自爆早年有街坊好着緊佢嘅婚姻大事，熱心為佢安排兩場「相睇」識女仔，但郭偉強覺得咁樣搵對象有啲怪，加上當年係事業搏殺期，最終睇咗都等於冇睇。