政情：政策大清貨聖誕前晒冷
佔領行動落幕唔夠一星期，政府各決策局隨即罕有地接連狂推多項政策，先有銅鑼灣清場後翌日公布終極自願醫保方案諮詢公眾，隔日再推自九八年以來首份長遠房屋策略報告等，都係市民期待已久又極具爭議嘅民生議題。唔少人認為政府呢個做法係企圖轉移市民視線、淡化佔領行動，實情係唔少政策早於佔領期間已有定案，奈何發生佔領後不利推出大政策，所以咪趁聖誕新年假期前急急推出，以免拖到明年又同政改第二階段諮詢撞期。
早前多個報告遭煞停
佔領行動持續逾兩個月，全港聚焦於佔領事件，行政、立法甚至司法兩個多月來可以話處於空轉狀態。隨着金鐘、銅鑼灣最後兩個佔領區終極清場，政府各決策局隨即響應特首梁振英（CY）方針，成熟一項，推出一項，率先由佔領期間唔喺風眼位嘅食物及衞生局局長高永文、運輸及房屋局局長張炳良擔綱演出。兩大報告一出，順利佔盡每日報章重要版位，驟眼望落好似事前未有協調報告出爐日子，唔似政府一貫作風，自然惹來各種揣測。
查實按原定計劃，多個決策局應該喺過去兩個月推出若干諮詢報告，但都因佔領而被煞停。佔領行動結束後，各局為免工作同聖誕佳節撞個正着，亦唔想拖到明年，惟有趁聖誕前檔期急急「大清倉」。事實上，唔止政府開快車做嘢，立法會於十月復會後多次因為佔「鐘」甚至大樓遭到示威者衝擊而被迫取消會議，即使復會亦淪為各黨派議員爭拗佔領事件嘅大舞台，實質獲通過嘅重要議案幾乎零。
明年或再讓路政改諮詢
直至臨近清場，立法會財務委員會先急急通過三個堆填區撥款議案，討論多年嘅男士侍產假議案亦都係呢幾日先獲通過。踏入明年，政府將迎來政改第二階段諮詢，屆時社會爭拗將再次因政改而白熱化，各項政策好大可能要再次讓路，照咁講，此時不推成熟嘅政策，更待何時？