中環出更：侯志強勢拉隊退出富貴黨
人丁單薄嘅自由黨（富貴黨）面臨新一輪退黨潮。據知身為黨中央委員嘅上水鄉事委員會主席侯志強萌生退意，更直言佢要走嘅話，鄉紳一定會共同進退，睇嚟富貴黨呢鋪都好頭痕。
當初入黨因田少
侯志強話，當初入黨全因同前黨魁田北俊（田少）係老友，加入後佢甚少參與黨務，連自己係黨中委都唔知。依家田少退咗落嚟，佢留低更加冇意思。侯志強仲話，富貴黨來來去去都係靠幾個明星保住議席，但地區工作經常交白卷，鄉紳好難撐得落。
據知當年加入富貴黨嘅鄉紳唔算多，喺區議會層面有票嘅只有侯志強同上水區議員兼上水鄉委會執委廖國華，富貴黨一向唔擅長打直選，因此田少一二年再戰新界東時，就積極拉攏侯志強入黨，希望借助佢喺新界東嘅人脈同影響力，為田少力保一席，最終亦如願以償。如果侯志強真係退黨，一六年立法會選舉分分鐘令富貴黨流失逾萬票，屆時可否保住議席，真係話唔埋o架。
卓妮